لا ياحميدتى لن يصدقك السودانيون
في خطابه بمناسبة العيد وجه قائد الدعم السريع التحية للشعب السوداني ، ومن سخريات القدر والعبث بالحقيقة ان يتحدث الدعم السريع عن العدل والحق والانصاف وجنوده ومنتسبوه بشكل عام يمارسون المنكرات كل يوم
ومن المناسب هنا ان ننقل تعليق احد السودانيين على كلمة حميدتى ونقول انه تعليق جميل ومعبر ونظن ان كثرين يتفقون معه ، وسوف ننقله كما هو دون تدخل بحرف
قال المعلق :
دقلو دا واعي بي الفرق بين البيعمل فيهو والبيقوله؟!
دقلو دا بيعتبرنا بشر بنفهم ولا شايفنا بهايم؟!!
يفترض الزول البيكتب ليه خطاباته دا يكون عنده فكره أنو البيسمعو الخطاب ديل كتييير منهم واجهوا قواته واتعاملوا معاها وعارفينهم بيتعاملوا كيف..
اذا اتفقنا معاك في انه الفلول ما عايزين صلح ولا تفاوض ولا سلام…. وانهم بدوا الحرب وطيرانهم قصف المدنيبن…
فانت شايف نفسك مؤهل أخلاقياً للحديث عن الانتهاكات؟!!!
وكمان بتورينا أنو توجيهاتك المستمرة هي برعاية الممتلكات الخاصة والعامة؟!! يا عيني يا عيني، دي قول غيرها..
وكمان جنودك بيحاربو عشان الديموقراطية ما كترت المحلبية خااالص كده!!!!
شوف نتكلم بصراحة انت والكيزان بيناتكم منافسة على ركوب ظهرنا وسرقة مواردنا، ومنافستكم اتحولت لي حرب، ونحنا علينا ندفع فاتورتها من دمنا ومالنا وأمننا ومستقبلنا،، انت بتنهبنا وتكتلنا والكيزان برضوا بينهبونا ويكتلونا وبيقولوا لازم الحرب تستمر عشان الفاتورة ما عليهم..
بالله حلوا عننا كلكم الله يقطع طاريكم
سليمان منصور
